„Vera svolítið tilbúin til að taka þátt í þessari frábæru, skemmtilegu og spennandi vegferð“. Mikilvægi þess að innleiða stefnu á árangursríkan hátt

Ritgerðin fjallar um innleiðingu á stefnu hjá íslensku fyrirtæki. Mótun stefnu hefur í gegnum tíðina fengið töluverða athygli á meðan innleiðing stefnunnar hefur ekki fengið eins mikla athygli fyrr en í seinni tíð. Innleiðing stefnu er hins vegar talin jafn mikilvæg, ef ekki mikilvægari en mótun stefnu og er talið að langstærstur hluti stefna nái ekki tilsettum árangri vegna lélegrar innleiðingar. Framkvæmd var bæði eigindleg og megindleg rannsókn. Stjórnendur fyrirtækisins voru fengnir í einstaklingsviðtöl til að segja frá stefnumótunarvinnu og innleiðingarferli fyrirtækisins. Til að forðast einhliða svör stjórnenda var einnig sendur spurningalisti á alla starfsmenn fyrirtækisins um þeirra sýn á stefnunni, stjórnendum og innleiðingunni. Ritgerðin skiptist í tvo hluta. Fyrri hluti ritgerðarinnar er fræðileg umfjöllun þar sem farið er yfir lykilhugtök og þá þætti sem þarf að huga að og varast, svo árangursrík innleiðing náist. Í seinni hluta ritgerðarinnar eru niðurstöður rannsóknarinnar kynntar ásamt hugmyndum að framtíðarrannsóknum. Helstu niðurstöður sýna að fyrirtækið sem rannsóknin sneri að virðist gera margt rétt í innleiðingarferlinu ásamt því að forðast mikilvægar hættur. Áhugavert er að stjórnendur fyrirtækisins virðast ekki fara beint eftir fræðunum í innleiðingarferlinu heldur treysta meira á eigin reynslu sem virðist skila góðum árangri